Энэ жилийн өвлийн Тэргүүн сарын шинийн нэгний өдөр 2023 оны 11 дүгээр сарын 14-ний өдөр тохиож байгаа бөгөөд ЭСЯ-наас “Монгол бахархлын өдөр”-т зориулсан нээлттэй өдөрлөгийг зохион байгуулахаар төлөвлөж байна.

Өдөрлөгийн үеэр монгол ёс заншил, түүх уламжлал, өв соёлын талаар ярилцаж, танилцуулга хийх бөгөөд үндэсний урлагийн авъяастай иргэдийг ЭСЯ-тай хамтран ажиллаж, өдөрлөгийн арга хэмжээнд оролцохыг уриалж байна.

ЭСЯ-наас “Монгол бахархлын өдөр”-т зориулан дараахь хоёр арга хэмжээг Чех, Словак улсуудад аж төрж буй иргэдийнхээ дунд явуулахаар төлөвлөж байна. Үүнд:

16 хүртэлх насны хүүхдүүдийн зурсан гар зургийн үзэсгэлэнг толилуулах. Зургийн сэдэв нь Эзэн Чингис Хааны үйл хэрэг, монгол ёс заншил, түүх уламжлал, өв соёлтой холбоотой өөрсдийн чөлөөт сэтгэмжээр бүтээгдсэн байх юм. Зургийг А4 хэмжээтэй цаасан дээр зурж, ЭСЯ-ны хаяг /Velvyslanectví Mongolska, Na Marně 608/5, 160 00 Praha/-аар 2023 оны 11 дүгээр сарын 10-ны дотор ирүүлнэ үү.

Богино хэмжээний видео мэндчилгээ. Иргэд та бүхэн гэр бүл, найз нөхөд, хамт олноороо, хотоороо, хувиараа “Монгол бахархлын өдөр”-ийг тохиолдуулан өөрийн бодол, уриалга, мэндчилгээ бэлтгэн ЭСЯ-ны фэйсбүүк хаягт ирүүлнэ үү. Видео мэндчилгээ нь 2 минут хүртэлх хугацаатай байж болох бөгөөд ирүүлсэн мэндчилгээнүүдийг өдөрлөгийн үеэр толилуулж, мөн ЭСЯ-ны фэйсбүүк хуудсанд байршуулах болно. Видеог ЭСЯ-ны ФБ чатаар 2023 оны 11 дүгээр сарын 10-ны дотор ирүүлнэ үү.

Иргэд Та бүхнийг өдөрлөгт идэвхтэй оролцохыг хүсье.

Жич: 11 дүгээр сарын 14-ний өдөр болох өдөрлөгийн талаарх дэлгэрэнгүй мэдээллийг тухай бүр нь хүргүүлэх юм.

Прага дахь ЭСЯ

2023 оны 10 дугаар сарын 24